9-may — Xotira va qadrlash kuni xalqimiz qalbida chuqur ma’naviy ahamiyatga ega bo‘lgan muqaddas sanalardan biridir. Bu kun yurtimiz ozodligi, bugungi tinch va osoyishta hayot yo‘lida jonini fido qilgan ajdodlarimiz xotirasini yod etish, urush va mehnat faxriylariga hurmat va ehtirom ko‘rsatish kuni sifatida keng nishonlanadi.
Ikkinchi jahon urushi insoniyat tarixidagi eng dahshatli va og‘ir sinovlardan biri bo‘ldi. Millionlab insonlar urush alangasida halok bo‘ldi, minglab oilalar ayriliq azobini boshdan kechirdi. O‘sha yillarda O‘zbekiston xalqi ham front va front ortida beqiyos jasorat va matonat namunasini ko‘rsatdi. Minglab o‘g‘lonlarimiz qo‘liga qurol olib, Vatan va tinchlik uchun jang maydonlariga otlandi. Ular qattiq sovuq, ochlik va mashaqqatlarga qaramay, yurt sha’ni va kelajak avlod tinchligi uchun kurash olib bordilar.
Front ortida qolgan yurtdoshlarimiz ham fidokorona mehnat qildilar. Ayollar, keksalar va yoshlar tun-u kun dalalarda, zavod-fabrikalarda ishladi. Ular askarlar uchun oziq-ovqat, kiyim-kechak va zarur mahsulotlarni tayyorlab, g‘alabaga munosib hissa qo‘shdilar. O‘zbekiston urush yillarida boshqa hududlardan ko‘chirib kelingan minglab yetim bolalarga boshpana va mehr berdi. Bu esa xalqimizning bag‘rikengligi va insonparvarligini yana bir bor namoyon etdi.
Bugun biz urush qatnashchilari va mehnat faxriylarini chuqur hurmat bilan eslaymiz. Ularning jasorati va mardligi tufayli bugungi tinch osmon, erkin va farovon hayotga erishildi. Har bir faxriyning hayot yo‘li — bu jasorat, sadoqat va vatanparvarlik maktabidir. Ularning ko‘rsatgan matonati yosh avlod qalbida Vatanga muhabbat va fidoyilik tuyg‘ularini shakllantirishda muhim ahamiyat kasb etadi.
Xotira — bu o‘tmishni unutmaslikdir. Ajdodlarimizning bosib o‘tgan mashaqqatli yo‘lini eslash, ular ko‘rsatgan qahramonlikni qadrlash xalqimizning ma’naviy burchidir. Chunki tarixni yodda tutgan millatgina o‘z kelajagini mustahkam qura oladi. Shu bois, 9-may kuni yurtimizdagi xiyobon va maydonlarda urush qurbonlari xotirasi yod etiladi, faxriylar holidan xabar olinadi, ularning xizmatlari ehtirom bilan tilga olinadi.
Bugungi tinchlik va osoyishtalik osonlik bilan qo‘lga kiritilmagan. Bu ne’mat ortida millionlab insonlarning ko‘z yoshi, sabri va jasorati mujassam. Shunday ekan, yurt tinchligini asrash, Vatan ravnaqi uchun munosib hissa qo‘shish har birimizning muqaddas vazifamizdir.
Xotira — millat qalbining abadiy nidosi, qadrlash esa insoniylikning eng oliy fazilatidir. Ajdodlarimiz xotirasi qalblarimizda mangu yashaydi.
Bugungi kunda Oʻzbekistonda urush va mehnat faxriylarini e’zozlash, ajdodlar xotirasini abadiylashtirish davlat siyosatining muhim yo‘nalishlaridan biriga aylangan. Yurtimizda 9-may sanasi munosabati bilan keng ko‘lamli ma’naviy-ma’rifiy tadbirlar, uchrashuvlar va xotira marosimlari tashkil etilib, faxriylar holidan xabar olinmoqda. Ularga moddiy va ma’naviy ko‘mak ko‘rsatish, yosh avlodni tarixiy xotira ruhida tarbiyalashga alohida e’tibor qaratilmoqda.
Ayniqsa, Gʻalaba bogʻi xalqimizning tarixiy xotirasini aks ettiruvchi muqaddas maskanlardan biri sifatida alohida ahamiyat kasb etadi. Ushbu bog‘ Ikkinchi jahon urushida qatnashgan vatandoshlarimizning jasorati va matonatini abadiylashtirish maqsadida barpo etilgan bo‘lib, bugungi kunda yoshlar uchun vatanparvarlik maktabiga aylangan. Bog‘ hududida urush yillaridagi mashaqqatli hayotni aks ettiruvchi yodgorliklar, haykallar va tarixiy kompozitsiyalar bunyod etilgan.
Shuningdek, bog‘dagi Shon-sharaf muzeyi urush davridagi tarixiy voqealarni o‘zida mujassam etgan maskan sifatida tashrif buyuruvchilarda katta taassurot qoldiradi. Muzeyda front va front ortidagi hayot, o‘zbekistonlik jangchilarning qahramonligi, urush yillaridagi xalqimizning fidokorona mehnati haqida noyob eksponatlar, hujjatlar va suratlar jamlangan. Bu esa yosh avlodga tarixni chuqur his qilish, ajdodlar jasoratidan faxrlanish tuyg‘usini singdirishga xizmat qilmoqda.
Bugungi kunda mamlakatimizning barcha hududlarida “Xotira abadiy”, “Inson qadri ulug‘” kabi shiorlar ostida ma’naviy tadbirlar o‘tkazilib, urush faxriylari va mehnat qahramonlariga yuksak hurmat ko‘rsatilmoqda. Zero, ajdodlar xotirasini e’zozlash — bu kelajak avlodga tinchlikning qadrini anglatish demakdir. O‘tmishni unutmagan xalqning kelajagi hamisha porloq bo‘ladi. Shu sababli, yurtimizda amalga oshirilayotgan bunday ezgu ishlar xalqimizning birdamligi, insonparvarligi va tarixiy xotiraga bo‘lgan yuksak hurmatining yorqin ifodasidir.
