2026-yil 23–27-mart kunlari Qozog‘iston Respublikasining Shymkent shahrida Radiochastota spektri va yo‘ldosh orbitalaridan foydalanishni tartibga solish bo‘yicha Aloqa sohasidagi mintaqaviy hamdo‘stlik (ASHH) Komissiyasining 29-yig‘ilishi (ASHH RChS va SO Komissiyasi), shuningdek, uning Butunjahon radiokommunikatsiya konferensiyasi va Radioaloqa assambleyasi 2027-yilga tayyorgarlik ko‘rish bo‘yicha ishchi guruhlari (BRK-27/RA-27), Radiochastota spektrini boshqarish bo‘yicha ishchi guruhi, Radioeshittirish bo‘yicha ishchi guruhlarining yig‘ilishlari bo‘lib o‘tmoqda.
Yig‘ilishda Armaniston Respublikasi, Belarus Respublikasi, Qozog‘iston Respublikasi, Qirg‘iz Respublikasi, Rossiya Federatsiyasi, Tojikiston Respublikasi, Ozarbayjon Respublikasi va O‘zbekiston Respublikasi aloqa ma’muriyatlari vakillaridan iborat 80 dan ortiq ishtirokchilar, shuningdek ASHH Ijroiya qo‘mitasi vakillari qatnashmoqda.
Tadbir Komissiyaning yalpi majlisi bilan ochildi, undan so‘ng kosmik aloqa texnologiyalarining istiqbolli rivojlanishi va ularning mobil tarmoqlar bilan integratsiyasiga bag‘ishlangan yuqori darajadagi panel sessiyasi bo‘lib o‘tdi.
Yig‘ilish RChS va YO bo‘yicha ASHH qo‘mitasi raisi Butenko Valeriy Vladimirovich tomonidan ochib berildi. Ishtirokchilarga Qozog‘iston Respublikasi aloqa ma’muriyati vakillari, ASHH Ijroiya qo‘mitasi bosh direktori Aleksey Borodin, shuningdek Xalqaro elektraloqa ittifoqi (XEI) Radioaloqa byurosi direktori Mario Manievich videomurojaat orqali tabrik so‘zlari bilan murojaat qildilar. O‘z chiqishlarida ular radiotexnologiyalar jadal rivojlanayotgan sharoitda mintaqaviy hamkorlikni kuchaytirish va ASHHga a’zo davlatlar manfaatlarini xalqaro darajada himoya qilish zarurligini alohida ta’kidladilar.
Asosiy e’tibor Butunjahon radioaloqa konferensiyasi va Radioaloqa assambleyasi 2027-yilga (BRK-27/RA-27) tayyorgarlikka qaratildi. Yalpi majlis davomida bir qator ustuvor masalalar ko‘rib chiqildi. Komissiya faoliyatining uzluksizligini ta’minlash doirasida Valeriy Butenko
28-yig‘ilish yakunlari bo‘yicha hisobot taqdim etdi va joriy yig‘ilishning asosiy vazifalarini belgilab berdi.
Xalqaro muvofiqlashtirish doirasida mintaqaviy telealoqa tashkilotlari vakillari ishtirokchilarni WRC-27ga tayyorgarlik jarayoni haqida xabardor qildilar, bu esa yondashuvlarni solishtirish, umumiy manfaatlarni aniqlash va keyingi hamkorlik yo‘nalishlarini belgilash imkonini berdi. XEI Radioaloqa (XEI-R) faoliyatida aloqa ma’muriyatlarining ishtirokiga alohida e’tibor qaratildi: tadqiqot komissiyalari va ishchi guruhlar faoliyati natijalari, shuningdek WRC-27 bo‘yicha birinchi mintaqalararo axborot sessiyasi yakunlari ko‘rib chiqildi.
Shuningdek, ishtirokchilar Radioregulyator qo‘mitasi va Radioaloqalar bo‘yicha maslahat guruhining kun tartibidagi masalalarni muhokama qildilar, ularning qarorlari mintaqada yo‘ldosh va yer usti aloqa tizimlari rivojiga bevosita ta’sir ko‘rsatadi.
Yig‘ilish yakunlariga ko‘ra, ASHHga a’zo davlatlar o‘rtasidagi muvofiqlashtirishning yuqori darajasi tasdiqlandi. Qabul qilingan qarorlar va kelishilgan takliflar yagona pozitsiyani shakllantirishda foydalanilib, yaqinlashib kelayotgan xalqaro tadbirlarda taqdim etiladi.
O‘zbekiston Respublikasi nomidan tadbirda Raqamli texnologiyalar vazirligi, “Elektromagnit moslashuv markazi” DUK hamda “UNICON.UZ” MChJ mutaxassislari ishtirok etmoqda.
Tayyorladi :
Turgunov Sh.
Tadjimatov R.
Kaxramonov A.
