Davlat madhiyasi — har bir xalqning o‘ziga xosligini, tarixiy xotirasini, milliy g‘ururi va mustaqil davlat sifatidagi qadr-qimmatini ifodalovchi muqaddas ramzdir. O‘zbekiston Respublikasi Davlat madhiyasi ham ana shunday yuksak ma’no va ruh uyg‘otuvchi ramzlardan biri bo‘lib, u mamlakat mustaqilligining mustahkam belgisi sifatida xalq qalbida alohida o‘rin tutadi. Ushbu sana munosabati bilan joriy yilning 9-dekabr kuni Qashqadaryo viloyati Elektromagnit moslashuv xizmatida davra suhbati tashkil qilindi. Dastlab tadbirda ishchi xodimlar tomonidan O‘zbekiston Respublikasi Davlat madhiyasi ijro etildi. Shundan so‘ng madhiyaga oid ma’lumotlar taqdim qilindi.
O‘zbekiston mustaqillikka erishgach, milliy ramzlarni yaratish masalasi kun tartibiga qo‘yildi. Davlat madhiyasi ham ana shu tarixiy jarayonning muhim qismidir. 1992-yil 10-dekabrda O‘zbekiston Respublikasi Oliy Kengashi tomonidan “O‘zbekiston Respublikasi Davlat madhiyasi to‘g‘risida”gi qonun qabul qilinib, madhiyaning matni va musiqasi tasdiqlandi.
Madhiya matni muallifi — O‘zbekiston xalq shoiri Abdulla Oripov,
musiqasi — mashhur bastakor Mutal Burhonovdir.
Bu ikki ijodkorning hamkorligi natijasida ona Vatan madhiga aylangan, yuksak poetik mazmunga ega asar dunyoga keldi.
Davlat madhiyasi O‘zbekiston xalqining:
• Vatanni sevish tuyg‘usi;
• Mustaqillik g‘oyasi;
• Qadriyatlar, tarixiy meros va buyuk ajdodlar xotirasi;
• Yurt tinchligi va ravnaqi
kabi eng ulug‘ maqsadlarini ifodalaydi.
Davlat madhiyasi muhim rasmiy tadbirlar, xalqaro uchrashuvlar, sport musobaqalari, davlat rahbarlari ishtirokidagi marosimlarda ijro etiladi. U nafaqat rasmiy ramz, balki har bir fuqaroning qalbidagi milliy g‘ururni uyg‘otuvchi kuchdir.
Maktablarda, oliy ta’lim muassasalarida, davlat va jamoat tashkilotlarida madhiyani hurmat bilan tinglash xalqimizda Vatanga muhabbat, yurtga sadoqat va mas’uliyat tuyg‘ularini mustahkamlaydi.
Madhiyani ijro etish yoki tinglash vaqtida tik turish, qo‘lni ko‘ksiga qo‘yish — bu davlat ramziga bo‘lgan hurmat timsolidir. Ushbu odob nafaqat tashqi ehtirom, balki ichki iftixor va milliy birlikning namoyonidir.
O‘zbekiston Respublikasi Davlat madhiyasi xalqning mustaqillik ruhi, vatanparvarlik tuyg‘usi, ulug‘ tarix va ma’naviy merosining ifodasidir. U yosh avlodni yurtga sadoqatli bo‘lib voyaga yetishga chorlaydi, katta avlodni esa Vatan oldidagi mas’uliyatini yodga soladi. Shuning uchun ham madhiyamiz — xalqning birligini, ozodligini va yorug‘ kelajakka bo‘lgan ishonchini mujassam etgan muqaddas ramzdir.
Tadbir davomida ishtirokchilar o‘zlarini qiziqtirgan savollar bilan murojaat qilgan holda, fikr-mulohazalar almashildi.
Tayyorladi: Qashqadaryo viloyati EMMX radiooperatori R.A. Utayev
